|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 8
Sūkta 80
|
1. Info |
| To: | 1-9: indra; 10: devāḥ |
|
| From: | ekadyū naudhasa | |
| Metres: | 1st set of styles: gāyatrī (4, 6, 7, 9, 10); nicṛdgāyatrī (2, 3, 5, 8); virāḍgāyatrī (1) 2nd set of styles: gāyatrī (1-9); triṣṭubh (10) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
08.080.01 (Mandala. Sukta. Rik)
6.5.35.01 (Ashtaka. Adhyaya. Varga. Rik)
08.08.140 (Mandala. Anuvāka. Rik)
Samhita Devanagari Accented
न॒ह्य१॒॑न्यं ब॒ळाक॑रं मर्डि॒तारं॑ शतक्रतो ।
त्वं न॑ इंद्र मृळय ॥
Samhita Devanagari Nonaccented
नह्यन्यं बळाकरं मर्डितारं शतक्रतो ।
त्वं न इंद्र मृळय ॥
Samhita Transcription Accented
nahyányám baḷā́karam marḍitā́ram śatakrato ǀ
tvám na indra mṛḷaya ǁ
Samhita Transcription Nonaccented
nahyanyam baḷākaram marḍitāram śatakrato ǀ
tvam na indra mṛḷaya ǁ
Padapatha Devanagari Accented
न॒हि । अ॒न्यम् । ब॒ळा । अक॑रम् । म॒र्डि॒तार॑म् । श॒त॒क्र॒तो॒ इति॑ शतऽक्रतो ।
त्वम् । नः॒ । इ॒न्द्र॒ । मृ॒ळ॒य॒ ॥
Padapatha Devanagari Nonaccented
नहि । अन्यम् । बळा । अकरम् । मर्डितारम् । शतक्रतो इति शतऽक्रतो ।
त्वम् । नः । इन्द्र । मृळय ॥
Padapatha Transcription Accented
nahí ǀ anyám ǀ baḷā́ ǀ ákaram ǀ marḍitā́ram ǀ śatakrato íti śata-krato ǀ
tvám ǀ naḥ ǀ indra ǀ mṛḷaya ǁ
Padapatha Transcription Nonaccented
nahi ǀ anyam ǀ baḷā ǀ akaram ǀ marḍitāram ǀ śatakrato iti śata-krato ǀ
tvam ǀ naḥ ǀ indra ǀ mṛḷaya ǁ
08.080.02 (Mandala. Sukta. Rik)
6.5.35.02 (Ashtaka. Adhyaya. Varga. Rik)
08.08.141 (Mandala. Anuvāka. Rik)
Samhita Devanagari Accented
यो नः॒ शश्व॑त्पु॒रावि॒थामृ॑ध्रो॒ वाज॑सातये ।
स त्वं न॑ इंद्र मृळय ॥
Samhita Devanagari Nonaccented
यो नः शश्वत्पुराविथामृध्रो वाजसातये ।
स त्वं न इंद्र मृळय ॥
Samhita Transcription Accented
yó naḥ śáśvatpurā́vithā́mṛdhro vā́jasātaye ǀ
sá tvám na indra mṛḷaya ǁ
Samhita Transcription Nonaccented
yo naḥ śaśvatpurāvithāmṛdhro vājasātaye ǀ
sa tvam na indra mṛḷaya ǁ
Padapatha Devanagari Accented
यः । नः॒ । शश्व॑त् । पु॒रा । आवि॑थ । अमृ॑ध्रः । वाज॑ऽसातये ।
सः । त्वम् । नः॒ । इ॒न्द्र॒ । मृ॒ळ॒य॒ ॥
Padapatha Devanagari Nonaccented
यः । नः । शश्वत् । पुरा । आविथ । अमृध्रः । वाजऽसातये ।
सः । त्वम् । नः । इन्द्र । मृळय ॥
Padapatha Transcription Accented
yáḥ ǀ naḥ ǀ śáśvat ǀ purā́ ǀ ā́vitha ǀ ámṛdhraḥ ǀ vā́ja-sātaye ǀ
sáḥ ǀ tvám ǀ naḥ ǀ indra ǀ mṛḷaya ǁ
Padapatha Transcription Nonaccented
yaḥ ǀ naḥ ǀ śaśvat ǀ purā ǀ āvitha ǀ amṛdhraḥ ǀ vāja-sātaye ǀ
saḥ ǀ tvam ǀ naḥ ǀ indra ǀ mṛḷaya ǁ
08.080.03 (Mandala. Sukta. Rik)
6.5.35.03 (Ashtaka. Adhyaya. Varga. Rik)
08.08.142 (Mandala. Anuvāka. Rik)
Samhita Devanagari Accented
किमं॒ग र॑ध्र॒चोद॑नः सुन्वा॒नस्या॑वि॒तेद॑सि ।
कु॒वित्स्विं॑द्र णः॒ शकः॑ ॥
Samhita Devanagari Nonaccented
किमंग रध्रचोदनः सुन्वानस्यावितेदसि ।
कुवित्स्विंद्र णः शकः ॥
Samhita Transcription Accented
kímaṅgá radhracódanaḥ sunvānásyāvitédasi ǀ
kuvítsvíndra ṇaḥ śákaḥ ǁ
Samhita Transcription Nonaccented
kimaṅga radhracodanaḥ sunvānasyāvitedasi ǀ
kuvitsvindra ṇaḥ śakaḥ ǁ
Padapatha Devanagari Accented
किम् । अ॒ङ्ग । र॒ध्र॒ऽचोद॑नः । सु॒न्वा॒नस्य॑ । अ॒वि॒ता । इत् । अ॒सि॒ ।
कु॒वित् । सु । इ॒न्द्र॒ । नः॒ । शकः॑ ॥
Padapatha Devanagari Nonaccented
किम् । अङ्ग । रध्रऽचोदनः । सुन्वानस्य । अविता । इत् । असि ।
कुवित् । सु । इन्द्र । नः । शकः ॥
Padapatha Transcription Accented
kím ǀ aṅgá ǀ radhra-códanaḥ ǀ sunvānásya ǀ avitā́ ǀ ít ǀ asi ǀ
kuvít ǀ sú ǀ indra ǀ naḥ ǀ śákaḥ ǁ
Padapatha Transcription Nonaccented
kim ǀ aṅga ǀ radhra-codanaḥ ǀ sunvānasya ǀ avitā ǀ it ǀ asi ǀ
kuvit ǀ su ǀ indra ǀ naḥ ǀ śakaḥ ǁ
08.080.04 (Mandala. Sukta. Rik)
6.5.35.04 (Ashtaka. Adhyaya. Varga. Rik)
08.08.143 (Mandala. Anuvāka. Rik)
Samhita Devanagari Accented
इंद्र॒ प्र णो॒ रथ॑मव प॒श्चाच्चि॒त्संत॑मद्रिवः ।
पु॒रस्ता॑देनं मे कृधि ॥
Samhita Devanagari Nonaccented
इंद्र प्र णो रथमव पश्चाच्चित्संतमद्रिवः ।
पुरस्तादेनं मे कृधि ॥
Samhita Transcription Accented
índra prá ṇo ráthamava paścā́ccitsántamadrivaḥ ǀ
purástādenam me kṛdhi ǁ
Samhita Transcription Nonaccented
indra pra ṇo rathamava paścāccitsantamadrivaḥ ǀ
purastādenam me kṛdhi ǁ
Padapatha Devanagari Accented
इन्द्र॑ । प्र । नः॒ । रथ॑म् । अ॒व॒ । प॒श्चात् । चि॒त् । सन्त॑म् । अ॒द्रि॒ऽवः॒ ।
पु॒रस्ता॑त् । ए॒न॒म् । मे॒ । कृ॒धि॒ ॥
Padapatha Devanagari Nonaccented
इन्द्र । प्र । नः । रथम् । अव । पश्चात् । चित् । सन्तम् । अद्रिऽवः ।
पुरस्तात् । एनम् । मे । कृधि ॥
Padapatha Transcription Accented
índra ǀ prá ǀ naḥ ǀ rátham ǀ ava ǀ paścā́t ǀ cit ǀ sántam ǀ adri-vaḥ ǀ
purástāt ǀ enam ǀ me ǀ kṛdhi ǁ
Padapatha Transcription Nonaccented
indra ǀ pra ǀ naḥ ǀ ratham ǀ ava ǀ paścāt ǀ cit ǀ santam ǀ adri-vaḥ ǀ
purastāt ǀ enam ǀ me ǀ kṛdhi ǁ
08.080.05 (Mandala. Sukta. Rik)
6.5.35.05 (Ashtaka. Adhyaya. Varga. Rik)
08.08.144 (Mandala. Anuvāka. Rik)
Samhita Devanagari Accented
हंतो॒ नु किमा॑ससे प्रथ॒मं नो॒ रथं॑ कृधि ।
उ॒प॒मं वा॑ज॒यु श्रवः॑ ॥
Samhita Devanagari Nonaccented
हंतो नु किमाससे प्रथमं नो रथं कृधि ।
उपमं वाजयु श्रवः ॥
Samhita Transcription Accented
hánto nú kímāsase prathamám no rátham kṛdhi ǀ
upamám vājayú śrávaḥ ǁ
Samhita Transcription Nonaccented
hanto nu kimāsase prathamam no ratham kṛdhi ǀ
upamam vājayu śravaḥ ǁ
Padapatha Devanagari Accented
हन्तो॒ इति॑ । नु । किम् । आ॒स॒से॒ । प्र॒थ॒मम् । नः॒ । रथ॑म् । कृ॒धि॒ ।
उ॒प॒ऽमम् । वा॒ज॒ऽयु । श्रवः॑ ॥
Padapatha Devanagari Nonaccented
हन्तो इति । नु । किम् । आससे । प्रथमम् । नः । रथम् । कृधि ।
उपऽमम् । वाजऽयु । श्रवः ॥
Padapatha Transcription Accented
hánto íti ǀ nú ǀ kím ǀ āsase ǀ prathamám ǀ naḥ ǀ rátham ǀ kṛdhi ǀ
upa-mám ǀ vāja-yú ǀ śrávaḥ ǁ
Padapatha Transcription Nonaccented
hanto iti ǀ nu ǀ kim ǀ āsase ǀ prathamam ǀ naḥ ǀ ratham ǀ kṛdhi ǀ
upa-mam ǀ vāja-yu ǀ śravaḥ ǁ
08.080.06 (Mandala. Sukta. Rik)
6.5.36.01 (Ashtaka. Adhyaya. Varga. Rik)
08.08.145 (Mandala. Anuvāka. Rik)
Samhita Devanagari Accented
अवा॑ नो वाज॒युं रथं॑ सु॒करं॑ ते॒ किमित्परि॑ ।
अ॒स्मान्त्सु जि॒ग्युष॑स्कृधि ॥
Samhita Devanagari Nonaccented
अवा नो वाजयुं रथं सुकरं ते किमित्परि ।
अस्मान्त्सु जिग्युषस्कृधि ॥
Samhita Transcription Accented
ávā no vājayúm rátham sukáram te kímítpári ǀ
asmā́ntsú jigyúṣaskṛdhi ǁ
Samhita Transcription Nonaccented
avā no vājayum ratham sukaram te kimitpari ǀ
asmāntsu jigyuṣaskṛdhi ǁ
Padapatha Devanagari Accented
अव॑ । नः॒ । वा॒ज॒ऽयुम् । रथ॑म् । सु॒ऽकर॑म् । ते॒ । किम् । इत् । परि॑ ।
अ॒स्मान् । सु । जि॒ग्युषः॑ । कृ॒धि॒ ॥
Padapatha Devanagari Nonaccented
अव । नः । वाजऽयुम् । रथम् । सुऽकरम् । ते । किम् । इत् । परि ।
अस्मान् । सु । जिग्युषः । कृधि ॥
Padapatha Transcription Accented
áva ǀ naḥ ǀ vāja-yúm ǀ rátham ǀ su-káram ǀ te ǀ kím ǀ ít ǀ pári ǀ
asmā́n ǀ sú ǀ jigyúṣaḥ ǀ kṛdhi ǁ
Padapatha Transcription Nonaccented
ava ǀ naḥ ǀ vāja-yum ǀ ratham ǀ su-karam ǀ te ǀ kim ǀ it ǀ pari ǀ
asmān ǀ su ǀ jigyuṣaḥ ǀ kṛdhi ǁ
08.080.07 (Mandala. Sukta. Rik)
6.5.36.02 (Ashtaka. Adhyaya. Varga. Rik)
08.08.146 (Mandala. Anuvāka. Rik)
Samhita Devanagari Accented
इंद्र॒ दृह्य॑स्व॒ पूर॑सि भ॒द्रा त॑ एति निष्कृ॒तं ।
इ॒यं धीर्ऋ॒त्विया॑वती ॥
Samhita Devanagari Nonaccented
इंद्र दृह्यस्व पूरसि भद्रा त एति निष्कृतं ।
इयं धीर्ऋत्वियावती ॥
Samhita Transcription Accented
índra dṛ́hyasva pū́rasi bhadrā́ ta eti niṣkṛtám ǀ
iyám dhī́rṛtvíyāvatī ǁ
Samhita Transcription Nonaccented
indra dṛhyasva pūrasi bhadrā ta eti niṣkṛtam ǀ
iyam dhīrṛtviyāvatī ǁ
Padapatha Devanagari Accented
इन्द्र॑ । दृह्य॑स्व । पूः । अ॒सि॒ । भ॒द्रा । ते॒ । ए॒ति॒ । निः॒ऽकृ॒तम् ।
इ॒यम् । धीः । ऋ॒त्विय॑ऽवती ॥
Padapatha Devanagari Nonaccented
इन्द्र । दृह्यस्व । पूः । असि । भद्रा । ते । एति । निःऽकृतम् ।
इयम् । धीः । ऋत्वियऽवती ॥
Padapatha Transcription Accented
índra ǀ dṛ́hyasva ǀ pū́ḥ ǀ asi ǀ bhadrā́ ǀ te ǀ eti ǀ niḥ-kṛtám ǀ
iyám ǀ dhī́ḥ ǀ ṛtvíya-vatī ǁ
Padapatha Transcription Nonaccented
indra ǀ dṛhyasva ǀ pūḥ ǀ asi ǀ bhadrā ǀ te ǀ eti ǀ niḥ-kṛtam ǀ
iyam ǀ dhīḥ ǀ ṛtviya-vatī ǁ
08.080.08 (Mandala. Sukta. Rik)
6.5.36.03 (Ashtaka. Adhyaya. Varga. Rik)
08.08.147 (Mandala. Anuvāka. Rik)
Samhita Devanagari Accented
मा सी॑मव॒द्य आ भा॑गु॒र्वी काष्ठा॑ हि॒तं धनं॑ ।
अ॒पावृ॑क्ता अर॒त्नयः॑ ॥
Samhita Devanagari Nonaccented
मा सीमवद्य आ भागुर्वी काष्ठा हितं धनं ।
अपावृक्ता अरत्नयः ॥
Samhita Transcription Accented
mā́ sīmavadyá ā́ bhāgurvī́ kā́ṣṭhā hitám dhánam ǀ
apā́vṛktā aratnáyaḥ ǁ
Samhita Transcription Nonaccented
mā sīmavadya ā bhāgurvī kāṣṭhā hitam dhanam ǀ
apāvṛktā aratnayaḥ ǁ
Padapatha Devanagari Accented
मा । सी॒म् । अ॒व॒द्ये । आ । भा॒क् । उ॒र्वी । काष्ठा॑ । हि॒तम् । धन॑म् ।
अ॒प॒ऽआवृ॑क्ताः । अ॒र॒त्नयः॑ ॥
Padapatha Devanagari Nonaccented
मा । सीम् । अवद्ये । आ । भाक् । उर्वी । काष्ठा । हितम् । धनम् ।
अपऽआवृक्ताः । अरत्नयः ॥
Padapatha Transcription Accented
mā́ ǀ sīm ǀ avadyé ǀ ā́ ǀ bhāk ǀ urvī́ ǀ kā́ṣṭhā ǀ hitám ǀ dhánam ǀ
apa-ā́vṛktāḥ ǀ aratnáyaḥ ǁ
Padapatha Transcription Nonaccented
mā ǀ sīm ǀ avadye ǀ ā ǀ bhāk ǀ urvī ǀ kāṣṭhā ǀ hitam ǀ dhanam ǀ
apa-āvṛktāḥ ǀ aratnayaḥ ǁ
08.080.09 (Mandala. Sukta. Rik)
6.5.36.04 (Ashtaka. Adhyaya. Varga. Rik)
08.08.148 (Mandala. Anuvāka. Rik)
Samhita Devanagari Accented
तु॒रीयं॒ नाम॑ य॒ज्ञियं॑ य॒दा कर॒स्तदु॑श्मसि ।
आदित्पति॑र्न ओहसे ॥
Samhita Devanagari Nonaccented
तुरीयं नाम यज्ञियं यदा करस्तदुश्मसि ।
आदित्पतिर्न ओहसे ॥
Samhita Transcription Accented
turī́yam nā́ma yajńíyam yadā́ kárastáduśmasi ǀ
ā́dítpátirna ohase ǁ
Samhita Transcription Nonaccented
turīyam nāma yajńiyam yadā karastaduśmasi ǀ
āditpatirna ohase ǁ
Padapatha Devanagari Accented
तु॒रीय॑म् । नाम॑ । य॒ज्ञिय॑म् । य॒दा । करः॑ । तत् । उ॒श्म॒सि॒ ।
आत् । इत् । पतिः॑ । नः॒ । ओ॒ह॒से॒ ॥
Padapatha Devanagari Nonaccented
तुरीयम् । नाम । यज्ञियम् । यदा । करः । तत् । उश्मसि ।
आत् । इत् । पतिः । नः । ओहसे ॥
Padapatha Transcription Accented
turī́yam ǀ nā́ma ǀ yajńíyam ǀ yadā́ ǀ káraḥ ǀ tát ǀ uśmasi ǀ
ā́t ǀ ít ǀ pátiḥ ǀ naḥ ǀ ohase ǁ
Padapatha Transcription Nonaccented
turīyam ǀ nāma ǀ yajńiyam ǀ yadā ǀ karaḥ ǀ tat ǀ uśmasi ǀ
āt ǀ it ǀ patiḥ ǀ naḥ ǀ ohase ǁ
08.080.10 (Mandala. Sukta. Rik)
6.5.36.05 (Ashtaka. Adhyaya. Varga. Rik)
08.08.149 (Mandala. Anuvāka. Rik)
Samhita Devanagari Accented
अवी॑वृधद्वो अमृता॒ अमं॑दीदेक॒द्यूर्दे॑वा उ॒त याश्च॑ देवीः ।
तस्मा॑ उ॒ राधः॑ कृणुत प्रश॒स्तं प्रा॒तर्म॒क्षू धि॒याव॑सुर्जगम्यात् ॥
Samhita Devanagari Nonaccented
अवीवृधद्वो अमृता अमंदीदेकद्यूर्देवा उत याश्च देवीः ।
तस्मा उ राधः कृणुत प्रशस्तं प्रातर्मक्षू धियावसुर्जगम्यात् ॥
Samhita Transcription Accented
ávīvṛdhadvo amṛtā ámandīdekadyū́rdevā utá yā́śca devīḥ ǀ
tásmā u rā́dhaḥ kṛṇuta praśastám prātármakṣū́ dhiyā́vasurjagamyāt ǁ
Samhita Transcription Nonaccented
avīvṛdhadvo amṛtā amandīdekadyūrdevā uta yāśca devīḥ ǀ
tasmā u rādhaḥ kṛṇuta praśastam prātarmakṣū dhiyāvasurjagamyāt ǁ
Padapatha Devanagari Accented
अवी॑वृधत् । वः॒ । अ॒मृ॒ताः॒ । अम॑न्दीत् । ए॒क॒ऽद्यूः । दे॒वाः॒ । उ॒त । याः । च॒ । दे॒वीः॒ ।
तस्मै॑ । ऊं॒ इति॑ । राधः॑ । कृ॒णु॒त॒ । प्र॒ऽश॒स्तम् । प्रा॒तः । म॒क्षु । धि॒याऽव॑सुः । ज॒ग॒म्या॒त् ॥
Padapatha Devanagari Nonaccented
अवीवृधत् । वः । अमृताः । अमन्दीत् । एकऽद्यूः । देवाः । उत । याः । च । देवीः ।
तस्मै । ऊं इति । राधः । कृणुत । प्रऽशस्तम् । प्रातः । मक्षु । धियाऽवसुः । जगम्यात् ॥
Padapatha Transcription Accented
ávīvṛdhat ǀ vaḥ ǀ amṛtāḥ ǀ ámandīt ǀ eka-dyū́ḥ ǀ devāḥ ǀ utá ǀ yā́ḥ ǀ ca ǀ devīḥ ǀ
tásmai ǀ ūṃ íti ǀ rā́dhaḥ ǀ kṛṇuta ǀ pra-śastám ǀ prātáḥ ǀ makṣú ǀ dhiyā́-vasuḥ ǀ jagamyāt ǁ
Padapatha Transcription Nonaccented
avīvṛdhat ǀ vaḥ ǀ amṛtāḥ ǀ amandīt ǀ eka-dyūḥ ǀ devāḥ ǀ uta ǀ yāḥ ǀ ca ǀ devīḥ ǀ
tasmai ǀ ūṃ iti ǀ rādhaḥ ǀ kṛṇuta ǀ pra-śastam ǀ prātaḥ ǀ makṣu ǀ dhiyā-vasuḥ ǀ jagamyāt ǁ