|
2. Audio |
by South Indian brahmins |
 |
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
Rig Veda
SANSKRIT Text & Audio
MAṆḌALA 10
Sūkta 87
|
1. Info |
| To: | agni rakṣohan | |
| From: | pāyu bhāradvāja | |
| Metres: | 1st set of styles: nicṛttriṣṭup (4-7, 9-11, 18, 19); triṣṭup (1, 8, 12, 17); bhuriktriṣṭup (13-16); virāṭtrisṭup (2, 3, 20); anuṣṭup (22, 23); nicṛdanuṣṭup (24, 25); pādanicṛttriṣṭup (21) 2nd set of styles: triṣṭubh (1-21); anuṣṭubh (22-25) |
|
2. Audio |
by South Indian brahmins |
|
||
by Sri Shyama Sundara Sharma and Sri Satya Krishna Bhatta. Recorded by Sriranga Digital Software Technologies Pvt. Ltd. (2012) |
|
|
3. Preferences |
Show these variants of riks numbering: |
||||||||
Mandala. Sukta. Rik |
||||||||
Ashtaka. Adhyaya. Varga. Rik |
||||||||
Mandala. Anuvāka. Rik |
||||||||
Show these variants of main text: |
||||||||
Samhita |
Devanagari |
Accent |
||||||
Samhita |
Devanagari |
Without accent |
||||||
Samhita |
Transcription |
Accent |
||||||
Samhita |
Transcription |
Without accent |
||||||
Padapatha |
Devanagari |
Accent |
||||||
Padapatha |
Devanagari |
Without accent |
||||||
Padapatha |
Transcription |
Accent |
||||||
Padapatha |
Transcription |
Without accent |
||||||
|
4. Text |
10.087.01 (Mandala. Sukta. Rik)
8.4.05.01 (Ashtaka. Adhyaya. Varga. Rik)
10.07.071 (Mandala. Anuvāka. Rik)
Samhita Devanagari Accented
र॒क्षो॒हणं॑ वा॒जिन॒मा जि॑घर्मि मि॒त्रं प्रथि॑ष्ठ॒मुप॑ यामि॒ शर्म॑ ।
शिशा॑नो अ॒ग्निः क्रतु॑भिः॒ समि॑द्धः॒ स नो॒ दिवा॒ स रि॒षः पा॑तु॒ नक्तं॑ ॥
Samhita Devanagari Nonaccented
रक्षोहणं वाजिनमा जिघर्मि मित्रं प्रथिष्ठमुप यामि शर्म ।
शिशानो अग्निः क्रतुभिः समिद्धः स नो दिवा स रिषः पातु नक्तं ॥
Samhita Transcription Accented
rakṣoháṇam vājínamā́ jigharmi mitrám práthiṣṭhamúpa yāmi śárma ǀ
śíśāno agníḥ krátubhiḥ sámiddhaḥ sá no dívā sá riṣáḥ pātu náktam ǁ
Samhita Transcription Nonaccented
rakṣohaṇam vājinamā jigharmi mitram prathiṣṭhamupa yāmi śarma ǀ
śiśāno agniḥ kratubhiḥ samiddhaḥ sa no divā sa riṣaḥ pātu naktam ǁ
Padapatha Devanagari Accented
र॒क्षः॒ऽहन॑म् । वा॒जिन॑म् । आ । जि॒घ॒र्मि॒ । मि॒त्रम् । प्रथि॑ष्ठम् । उप॑ । या॒मि॒ । शर्म॑ ।
शिशा॑नः । अ॒ग्निः । क्रतु॑ऽभिः । सम्ऽइ॑द्धः । सः । नः॒ । दिवा॑ । सः । रि॒षः । पा॒तु॒ । नक्त॑म् ॥
Padapatha Devanagari Nonaccented
रक्षःऽहनम् । वाजिनम् । आ । जिघर्मि । मित्रम् । प्रथिष्ठम् । उप । यामि । शर्म ।
शिशानः । अग्निः । क्रतुऽभिः । सम्ऽइद्धः । सः । नः । दिवा । सः । रिषः । पातु । नक्तम् ॥
Padapatha Transcription Accented
rakṣaḥ-hánam ǀ vājínam ǀ ā́ ǀ jigharmi ǀ mitrám ǀ práthiṣṭham ǀ úpa ǀ yāmi ǀ śárma ǀ
śíśānaḥ ǀ agníḥ ǀ krátu-bhiḥ ǀ sám-iddhaḥ ǀ sáḥ ǀ naḥ ǀ dívā ǀ sáḥ ǀ riṣáḥ ǀ pātu ǀ náktam ǁ
Padapatha Transcription Nonaccented
rakṣaḥ-hanam ǀ vājinam ǀ ā ǀ jigharmi ǀ mitram ǀ prathiṣṭham ǀ upa ǀ yāmi ǀ śarma ǀ
śiśānaḥ ǀ agniḥ ǀ kratu-bhiḥ ǀ sam-iddhaḥ ǀ saḥ ǀ naḥ ǀ divā ǀ saḥ ǀ riṣaḥ ǀ pātu ǀ naktam ǁ
10.087.02 (Mandala. Sukta. Rik)
8.4.05.02 (Ashtaka. Adhyaya. Varga. Rik)
10.07.072 (Mandala. Anuvāka. Rik)
Samhita Devanagari Accented
अयो॑दंष्ट्रो अ॒र्चिषा॑ यातु॒धाना॒नुप॑ स्पृश जातवेदः॒ समि॑द्धः ।
आ जि॒ह्वया॒ मूर॑देवान्रभस्व क्र॒व्यादो॑ वृ॒क्त्व्यपि॑ धत्स्वा॒सन् ॥
Samhita Devanagari Nonaccented
अयोदंष्ट्रो अर्चिषा यातुधानानुप स्पृश जातवेदः समिद्धः ।
आ जिह्वया मूरदेवान्रभस्व क्रव्यादो वृक्त्व्यपि धत्स्वासन् ॥
Samhita Transcription Accented
áyodaṃṣṭro arcíṣā yātudhā́nānúpa spṛśa jātavedaḥ sámiddhaḥ ǀ
ā́ jihváyā mū́radevānrabhasva kravyā́do vṛktvyápi dhatsvāsán ǁ
Samhita Transcription Nonaccented
ayodaṃṣṭro arciṣā yātudhānānupa spṛśa jātavedaḥ samiddhaḥ ǀ
ā jihvayā mūradevānrabhasva kravyādo vṛktvyapi dhatsvāsan ǁ
Padapatha Devanagari Accented
अयः॑ऽदंष्ट्रः । अ॒र्चिषा॑ । या॒तु॒ऽधाना॑न् । उप॑ । स्पृ॒श॒ । जा॒त॒ऽवे॒दः॒ । सम्ऽइ॑द्धः ।
आ । जि॒ह्वया॑ । मूर॑ऽदेवान् । र॒भ॒स्व॒ । क्र॒व्य॒ऽअदः॑ । वृ॒क्त्वी । अपि॑ । ध॒त्स्व॒ । आ॒सन् ॥
Padapatha Devanagari Nonaccented
अयःऽदंष्ट्रः । अर्चिषा । यातुऽधानान् । उप । स्पृश । जातऽवेदः । सम्ऽइद्धः ।
आ । जिह्वया । मूरऽदेवान् । रभस्व । क्रव्यऽअदः । वृक्त्वी । अपि । धत्स्व । आसन् ॥
Padapatha Transcription Accented
áyaḥ-daṃṣṭraḥ ǀ arcíṣā ǀ yātu-dhā́nān ǀ úpa ǀ spṛśa ǀ jāta-vedaḥ ǀ sám-iddhaḥ ǀ
ā́ ǀ jihváyā ǀ mū́ra-devān ǀ rabhasva ǀ kravya-ádaḥ ǀ vṛktvī́ ǀ ápi ǀ dhatsva ǀ āsán ǁ
Padapatha Transcription Nonaccented
ayaḥ-daṃṣṭraḥ ǀ arciṣā ǀ yātu-dhānān ǀ upa ǀ spṛśa ǀ jāta-vedaḥ ǀ sam-iddhaḥ ǀ
ā ǀ jihvayā ǀ mūra-devān ǀ rabhasva ǀ kravya-adaḥ ǀ vṛktvī ǀ api ǀ dhatsva ǀ āsan ǁ
10.087.03 (Mandala. Sukta. Rik)
8.4.05.03 (Ashtaka. Adhyaya. Varga. Rik)
10.07.073 (Mandala. Anuvāka. Rik)
Samhita Devanagari Accented
उ॒भोभ॑यावि॒न्नुप॑ धेहि॒ दंष्ट्रा॑ हिं॒स्रः शिशा॒नोऽव॑रं॒ परं॑ च ।
उ॒तांतरि॑क्षे॒ परि॑ याहि राजं॒जंभैः॒ सं धे॑ह्य॒भि या॑तु॒धाना॑न् ॥
Samhita Devanagari Nonaccented
उभोभयाविन्नुप धेहि दंष्ट्रा हिंस्रः शिशानोऽवरं परं च ।
उतांतरिक्षे परि याहि राजंजंभैः सं धेह्यभि यातुधानान् ॥
Samhita Transcription Accented
ubhóbhayāvinnúpa dhehi dáṃṣṭrā hiṃsráḥ śíśānó’varam páram ca ǀ
utā́ntárikṣe pári yāhi rājañjámbhaiḥ sám dhehyabhí yātudhā́nān ǁ
Samhita Transcription Nonaccented
ubhobhayāvinnupa dhehi daṃṣṭrā hiṃsraḥ śiśāno’varam param ca ǀ
utāntarikṣe pari yāhi rājañjambhaiḥ sam dhehyabhi yātudhānān ǁ
Padapatha Devanagari Accented
उ॒भा । उ॒भ॒या॒वि॒न् । उप॑ । धे॒हि॒ । दंष्ट्रा॑ । हिं॒स्रः । शिशा॑नः । अव॑रम् । पर॑म् । च॒ ।
उ॒त । अ॒न्तरि॑क्षे । परि॑ । या॒हि॒ । रा॒ज॒न् । जम्भैः॑ । सम् । धे॒हि॒ । अ॒भि । या॒तु॒ऽधाना॑न् ॥
Padapatha Devanagari Nonaccented
उभा । उभयाविन् । उप । धेहि । दंष्ट्रा । हिंस्रः । शिशानः । अवरम् । परम् । च ।
उत । अन्तरिक्षे । परि । याहि । राजन् । जम्भैः । सम् । धेहि । अभि । यातुऽधानान् ॥
Padapatha Transcription Accented
ubhā́ ǀ ubhayāvin ǀ úpa ǀ dhehi ǀ dáṃṣṭrā ǀ hiṃsráḥ ǀ śíśānaḥ ǀ ávaram ǀ páram ǀ ca ǀ
utá ǀ antárikṣe ǀ pári ǀ yāhi ǀ rājan ǀ jámbhaiḥ ǀ sám ǀ dhehi ǀ abhí ǀ yātu-dhā́nān ǁ
Padapatha Transcription Nonaccented
ubhā ǀ ubhayāvin ǀ upa ǀ dhehi ǀ daṃṣṭrā ǀ hiṃsraḥ ǀ śiśānaḥ ǀ avaram ǀ param ǀ ca ǀ
uta ǀ antarikṣe ǀ pari ǀ yāhi ǀ rājan ǀ jambhaiḥ ǀ sam ǀ dhehi ǀ abhi ǀ yātu-dhānān ǁ
10.087.04 (Mandala. Sukta. Rik)
8.4.05.04 (Ashtaka. Adhyaya. Varga. Rik)
10.07.074 (Mandala. Anuvāka. Rik)
Samhita Devanagari Accented
य॒ज्ञैरिषूः॑ सं॒नम॑मानो अग्ने वा॒चा श॒ल्याँ अ॒शनि॑भिर्दिहा॒नः ।
ताभि॑र्विध्य॒ हृद॑ये यातु॒धाना॑न्प्रती॒चो बा॒हून्प्रति॑ भङ्ध्येषां ॥
Samhita Devanagari Nonaccented
यज्ञैरिषूः संनममानो अग्ने वाचा शल्याँ अशनिभिर्दिहानः ।
ताभिर्विध्य हृदये यातुधानान्प्रतीचो बाहून्प्रति भङ्ध्येषां ॥
Samhita Transcription Accented
yajñáiríṣūḥ saṃnámamāno agne vācā́ śalyā́m̐ aśánibhirdihānáḥ ǀ
tā́bhirvidhya hṛ́daye yātudhā́nānpratīcó bāhū́npráti bhaṅdhyeṣām ǁ
Samhita Transcription Nonaccented
yajñairiṣūḥ saṃnamamāno agne vācā śalyām̐ aśanibhirdihānaḥ ǀ
tābhirvidhya hṛdaye yātudhānānpratīco bāhūnprati bhaṅdhyeṣām ǁ
Padapatha Devanagari Accented
य॒ज्ञैः । इषूः॑ । स॒म्ऽनम॑मानः । अ॒ग्ने॒ । वा॒चा । श॒ल्यान् । अ॒शनि॑ऽभिः । दि॒हा॒नः ।
ताभिः॑ । वि॒ध्य॒ । हृद॑ये । या॒तु॒ऽधाना॑न् । प्र॒ती॒चः । बा॒हून् । प्रति॑ । भ॒ङ्धि॒ । ए॒षा॒म् ॥
Padapatha Devanagari Nonaccented
यज्ञैः । इषूः । सम्ऽनममानः । अग्ने । वाचा । शल्यान् । अशनिऽभिः । दिहानः ।
ताभिः । विध्य । हृदये । यातुऽधानान् । प्रतीचः । बाहून् । प्रति । भङ्धि । एषाम् ॥
Padapatha Transcription Accented
yajñáiḥ ǀ íṣūḥ ǀ sam-námamānaḥ ǀ agne ǀ vācā́ ǀ śalyā́n ǀ aśáni-bhiḥ ǀ dihānáḥ ǀ
tā́bhiḥ ǀ vidhya ǀ hṛ́daye ǀ yātu-dhā́nān ǀ pratīcáḥ ǀ bāhū́n ǀ práti ǀ bhaṅdhi ǀ eṣām ǁ
Padapatha Transcription Nonaccented
yajñaiḥ ǀ iṣūḥ ǀ sam-namamānaḥ ǀ agne ǀ vācā ǀ śalyān ǀ aśani-bhiḥ ǀ dihānaḥ ǀ
tābhiḥ ǀ vidhya ǀ hṛdaye ǀ yātu-dhānān ǀ pratīcaḥ ǀ bāhūn ǀ prati ǀ bhaṅdhi ǀ eṣām ǁ
10.087.05 (Mandala. Sukta. Rik)
8.4.05.05 (Ashtaka. Adhyaya. Varga. Rik)
10.07.075 (Mandala. Anuvāka. Rik)
Samhita Devanagari Accented
अग्ने॒ त्वचं॑ यातु॒धान॑स्य भिंधि हिं॒स्राशनि॒र्हर॑सा हंत्वेनं ।
प्र पर्वा॑णि जातवेदः शृणीहि क्र॒व्यात्क्र॑वि॒ष्णुर्वि चि॑नोतु वृ॒क्णं ॥
Samhita Devanagari Nonaccented
अग्ने त्वचं यातुधानस्य भिंधि हिंस्राशनिर्हरसा हंत्वेनं ।
प्र पर्वाणि जातवेदः शृणीहि क्रव्यात्क्रविष्णुर्वि चिनोतु वृक्णं ॥
Samhita Transcription Accented
ágne tvácam yātudhā́nasya bhindhi hiṃsrā́śánirhárasā hantvenam ǀ
prá párvāṇi jātavedaḥ śṛṇīhi kravyā́tkraviṣṇúrví cinotu vṛkṇám ǁ
Samhita Transcription Nonaccented
agne tvacam yātudhānasya bhindhi hiṃsrāśanirharasā hantvenam ǀ
pra parvāṇi jātavedaḥ śṛṇīhi kravyātkraviṣṇurvi cinotu vṛkṇam ǁ
Padapatha Devanagari Accented
अग्ने॑ । त्वच॑म् । या॒तु॒ऽधान॑स्य । भि॒न्धि॒ । हिं॒स्रा । अ॒शनिः॑ । हर॑सा । ह॒न्तु॒ । ए॒न॒म् ।
प्र । पर्वा॑णि । जा॒त॒ऽवे॒दः॒ । शृ॒णी॒हि॒ । क्र॒व्य॒ऽअत् । क्र॒वि॒ष्णुः । वि । चि॒नो॒तु॒ । वृ॒क्णम् ॥
Padapatha Devanagari Nonaccented
अग्ने । त्वचम् । यातुऽधानस्य । भिन्धि । हिंस्रा । अशनिः । हरसा । हन्तु । एनम् ।
प्र । पर्वाणि । जातऽवेदः । शृणीहि । क्रव्यऽअत् । क्रविष्णुः । वि । चिनोतु । वृक्णम् ॥
Padapatha Transcription Accented
ágne ǀ tvácam ǀ yātu-dhā́nasya ǀ bhindhi ǀ hiṃsrā́ ǀ aśániḥ ǀ hárasā ǀ hantu ǀ enam ǀ
prá ǀ párvāṇi ǀ jāta-vedaḥ ǀ śṛṇīhi ǀ kravya-át ǀ kraviṣṇúḥ ǀ ví ǀ cinotu ǀ vṛkṇám ǁ
Padapatha Transcription Nonaccented
agne ǀ tvacam ǀ yātu-dhānasya ǀ bhindhi ǀ hiṃsrā ǀ aśaniḥ ǀ harasā ǀ hantu ǀ enam ǀ
pra ǀ parvāṇi ǀ jāta-vedaḥ ǀ śṛṇīhi ǀ kravya-at ǀ kraviṣṇuḥ ǀ vi ǀ cinotu ǀ vṛkṇam ǁ
10.087.06 (Mandala. Sukta. Rik)
8.4.06.01 (Ashtaka. Adhyaya. Varga. Rik)
10.07.076 (Mandala. Anuvāka. Rik)
Samhita Devanagari Accented
यत्रे॒दानीं॒ पश्य॑सि जातवेद॒स्तिष्ठं॑तमग्न उ॒त वा॒ चरं॑तं ।
यद्वां॒तरि॑क्षे प॒थिभिः॒ पतं॑तं॒ तमस्ता॑ विध्य॒ शर्वा॒ शिशा॑नः ॥
Samhita Devanagari Nonaccented
यत्रेदानीं पश्यसि जातवेदस्तिष्ठंतमग्न उत वा चरंतं ।
यद्वांतरिक्षे पथिभिः पतंतं तमस्ता विध्य शर्वा शिशानः ॥
Samhita Transcription Accented
yátredā́nīm páśyasi jātavedastíṣṭhantamagna utá vā cárantam ǀ
yádvāntárikṣe pathíbhiḥ pátantam támástā vidhya śárvā śíśānaḥ ǁ
Samhita Transcription Nonaccented
yatredānīm paśyasi jātavedastiṣṭhantamagna uta vā carantam ǀ
yadvāntarikṣe pathibhiḥ patantam tamastā vidhya śarvā śiśānaḥ ǁ
Padapatha Devanagari Accented
यत्र॑ । इ॒दानी॑म् । पश्य॑सि । जा॒त॒ऽवे॒दः॒ । तिष्ठ॑न्तम् । अ॒ग्ने॒ । उ॒त । वा॒ । चर॑न्तम् ।
यत् । वा॒ । अ॒न्तरि॑क्षे । प॒थिऽभिः॑ । पत॑न्तम् । तम् । अस्ता॑ । वि॒ध्य॒ । शर्वा॑ । शिशा॑नः ॥
Padapatha Devanagari Nonaccented
यत्र । इदानीम् । पश्यसि । जातऽवेदः । तिष्ठन्तम् । अग्ने । उत । वा । चरन्तम् ।
यत् । वा । अन्तरिक्षे । पथिऽभिः । पतन्तम् । तम् । अस्ता । विध्य । शर्वा । शिशानः ॥
Padapatha Transcription Accented
yátra ǀ idā́nīm ǀ páśyasi ǀ jāta-vedaḥ ǀ tíṣṭhantam ǀ agne ǀ utá ǀ vā ǀ cárantam ǀ
yát ǀ vā ǀ antárikṣe ǀ pathí-bhiḥ ǀ pátantam ǀ tám ǀ ástā ǀ vidhya ǀ śárvā ǀ śíśānaḥ ǁ
Padapatha Transcription Nonaccented
yatra ǀ idānīm ǀ paśyasi ǀ jāta-vedaḥ ǀ tiṣṭhantam ǀ agne ǀ uta ǀ vā ǀ carantam ǀ
yat ǀ vā ǀ antarikṣe ǀ pathi-bhiḥ ǀ patantam ǀ tam ǀ astā ǀ vidhya ǀ śarvā ǀ śiśānaḥ ǁ
10.087.07 (Mandala. Sukta. Rik)
8.4.06.02 (Ashtaka. Adhyaya. Varga. Rik)
10.07.077 (Mandala. Anuvāka. Rik)
Samhita Devanagari Accented
उ॒ताल॑ब्धं स्पृणुहि जातवेद आलेभा॒नादृ॒ष्टिभि॑र्यातु॒धाना॑त् ।
अग्ने॒ पूर्वो॒ नि ज॑हि॒ शोशु॑चान आ॒मादः॒ क्ष्विंका॒स्तम॑दं॒त्वेनीः॑ ॥
Samhita Devanagari Nonaccented
उतालब्धं स्पृणुहि जातवेद आलेभानादृष्टिभिर्यातुधानात् ।
अग्ने पूर्वो नि जहि शोशुचान आमादः क्ष्विंकास्तमदंत्वेनीः ॥
Samhita Transcription Accented
utā́labdham spṛṇuhi jātaveda ālebhānā́dṛṣṭíbhiryātudhā́nāt ǀ
ágne pū́rvo ní jahi śóśucāna āmā́daḥ kṣvíṅkāstámadantvénīḥ ǁ
Samhita Transcription Nonaccented
utālabdham spṛṇuhi jātaveda ālebhānādṛṣṭibhiryātudhānāt ǀ
agne pūrvo ni jahi śośucāna āmādaḥ kṣviṅkāstamadantvenīḥ ǁ
Padapatha Devanagari Accented
उ॒त । आऽल॑ब्धम् । स्पृ॒णु॒हि॒ । जा॒त॒ऽवे॒दः॒ । आ॒ऽले॒भा॒नात् । ऋ॒ष्टिऽभिः॑ । या॒तु॒ऽधाना॑त् ।
अग्ने॑ । पूर्वः॑ । नि । ज॒हि॒ । शोशु॑चानः । आ॒म॒ऽअदः॑ । क्ष्विङ्काः॑ । तम् । अ॒द॒न्तु॒ । एनीः॑ ॥
Padapatha Devanagari Nonaccented
उत । आऽलब्धम् । स्पृणुहि । जातऽवेदः । आऽलेभानात् । ऋष्टिऽभिः । यातुऽधानात् ।
अग्ने । पूर्वः । नि । जहि । शोशुचानः । आमऽअदः । क्ष्विङ्काः । तम् । अदन्तु । एनीः ॥
Padapatha Transcription Accented
utá ǀ ā́-labdham ǀ spṛṇuhi ǀ jāta-vedaḥ ǀ ā-lebhānā́t ǀ ṛṣṭí-bhiḥ ǀ yātu-dhā́nāt ǀ
ágne ǀ pū́rvaḥ ǀ ní ǀ jahi ǀ śóśucānaḥ ǀ āma-ádaḥ ǀ kṣvíṅkāḥ ǀ tám ǀ adantu ǀ énīḥ ǁ
Padapatha Transcription Nonaccented
uta ǀ ā-labdham ǀ spṛṇuhi ǀ jāta-vedaḥ ǀ ā-lebhānāt ǀ ṛṣṭi-bhiḥ ǀ yātu-dhānāt ǀ
agne ǀ pūrvaḥ ǀ ni ǀ jahi ǀ śośucānaḥ ǀ āma-adaḥ ǀ kṣviṅkāḥ ǀ tam ǀ adantu ǀ enīḥ ǁ
10.087.08 (Mandala. Sukta. Rik)
8.4.06.03 (Ashtaka. Adhyaya. Varga. Rik)
10.07.078 (Mandala. Anuvāka. Rik)
Samhita Devanagari Accented
इ॒ह प्र ब्रू॑हि यत॒मः सो अ॑ग्ने॒ यो या॑तु॒धानो॒ य इ॒दं कृ॒णोति॑ ।
तमा र॑भस्व स॒मिधा॑ यविष्ठ नृ॒चक्ष॑स॒श्चक्षु॑षे रंधयैनं ॥
Samhita Devanagari Nonaccented
इह प्र ब्रूहि यतमः सो अग्ने यो यातुधानो य इदं कृणोति ।
तमा रभस्व समिधा यविष्ठ नृचक्षसश्चक्षुषे रंधयैनं ॥
Samhita Transcription Accented
ihá prá brūhi yatamáḥ só agne yó yātudhā́no yá idám kṛṇóti ǀ
támā́ rabhasva samídhā yaviṣṭha nṛcákṣasaścákṣuṣe randhayainam ǁ
Samhita Transcription Nonaccented
iha pra brūhi yatamaḥ so agne yo yātudhāno ya idam kṛṇoti ǀ
tamā rabhasva samidhā yaviṣṭha nṛcakṣasaścakṣuṣe randhayainam ǁ
Padapatha Devanagari Accented
इ॒ह । प्र । ब्रू॒हि॒ । य॒त॒मः । सः । अ॒ग्ने॒ । यः । या॒तु॒ऽधानः॑ । यः । इ॒दम् । कृ॒णोति॑ ।
तम् । आ । र॒भ॒स्व॒ । स॒म्ऽइधा॑ । य॒वि॒ष्ठ॒ । नृ॒ऽचक्ष॑सः । चक्षु॑षे । र॒न्ध॒य॒ । ए॒न॒म् ॥
Padapatha Devanagari Nonaccented
इह । प्र । ब्रूहि । यतमः । सः । अग्ने । यः । यातुऽधानः । यः । इदम् । कृणोति ।
तम् । आ । रभस्व । सम्ऽइधा । यविष्ठ । नृऽचक्षसः । चक्षुषे । रन्धय । एनम् ॥
Padapatha Transcription Accented
ihá ǀ prá ǀ brūhi ǀ yatamáḥ ǀ sáḥ ǀ agne ǀ yáḥ ǀ yātu-dhā́naḥ ǀ yáḥ ǀ idám ǀ kṛṇóti ǀ
tám ǀ ā́ ǀ rabhasva ǀ sam-ídhā ǀ yaviṣṭha ǀ nṛ-cákṣasaḥ ǀ cákṣuṣe ǀ randhaya ǀ enam ǁ
Padapatha Transcription Nonaccented
iha ǀ pra ǀ brūhi ǀ yatamaḥ ǀ saḥ ǀ agne ǀ yaḥ ǀ yātu-dhānaḥ ǀ yaḥ ǀ idam ǀ kṛṇoti ǀ
tam ǀ ā ǀ rabhasva ǀ sam-idhā ǀ yaviṣṭha ǀ nṛ-cakṣasaḥ ǀ cakṣuṣe ǀ randhaya ǀ enam ǁ
10.087.09 (Mandala. Sukta. Rik)
8.4.06.04 (Ashtaka. Adhyaya. Varga. Rik)
10.07.079 (Mandala. Anuvāka. Rik)
Samhita Devanagari Accented
ती॒क्ष्णेना॑ग्ने॒ चक्षु॑षा रक्ष य॒ज्ञं प्रांचं॒ वसु॑भ्यः॒ प्र ण॑य प्रचेतः ।
हिं॒स्रं रक्षां॑स्य॒भि शोशु॑चानं॒ मा त्वा॑ दभन्यातु॒धाना॑ नृचक्षः ॥
Samhita Devanagari Nonaccented
तीक्ष्णेनाग्ने चक्षुषा रक्ष यज्ञं प्रांचं वसुभ्यः प्र णय प्रचेतः ।
हिंस्रं रक्षांस्यभि शोशुचानं मा त्वा दभन्यातुधाना नृचक्षः ॥
Samhita Transcription Accented
tīkṣṇénāgne cákṣuṣā rakṣa yajñám prā́ñcam vásubhyaḥ prá ṇaya pracetaḥ ǀ
hiṃsrám rákṣāṃsyabhí śóśucānam mā́ tvā dabhanyātudhā́nā nṛcakṣaḥ ǁ
Samhita Transcription Nonaccented
tīkṣṇenāgne cakṣuṣā rakṣa yajñam prāñcam vasubhyaḥ pra ṇaya pracetaḥ ǀ
hiṃsram rakṣāṃsyabhi śośucānam mā tvā dabhanyātudhānā nṛcakṣaḥ ǁ
Padapatha Devanagari Accented
ती॒क्ष्णेन॑ । अ॒ग्ने॒ । चक्षु॑षा । र॒क्ष॒ । य॒ज्ञम् । प्राञ्च॑म् । वसु॑ऽभ्यः । प्र । न॒य॒ । प्र॒ऽचे॒तः॒ ।
हिं॒स्रम् । रक्षां॑सि । अ॒भि । शोशु॑चानम् । मा । त्वा॒ । द॒भ॒न् । या॒तु॒ऽधानाः॑ । नृ॒ऽच॒क्षः॒ ॥
Padapatha Devanagari Nonaccented
तीक्ष्णेन । अग्ने । चक्षुषा । रक्ष । यज्ञम् । प्राञ्चम् । वसुऽभ्यः । प्र । नय । प्रऽचेतः ।
हिंस्रम् । रक्षांसि । अभि । शोशुचानम् । मा । त्वा । दभन् । यातुऽधानाः । नृऽचक्षः ॥
Padapatha Transcription Accented
tīkṣṇéna ǀ agne ǀ cákṣuṣā ǀ rakṣa ǀ yajñám ǀ prā́ñcam ǀ vásu-bhyaḥ ǀ prá ǀ naya ǀ pra-cetaḥ ǀ
hiṃsrám ǀ rákṣāṃsi ǀ abhí ǀ śóśucānam ǀ mā́ ǀ tvā ǀ dabhan ǀ yātu-dhā́nāḥ ǀ nṛ-cakṣaḥ ǁ
Padapatha Transcription Nonaccented
tīkṣṇena ǀ agne ǀ cakṣuṣā ǀ rakṣa ǀ yajñam ǀ prāñcam ǀ vasu-bhyaḥ ǀ pra ǀ naya ǀ pra-cetaḥ ǀ
hiṃsram ǀ rakṣāṃsi ǀ abhi ǀ śośucānam ǀ mā ǀ tvā ǀ dabhan ǀ yātu-dhānāḥ ǀ nṛ-cakṣaḥ ǁ
10.087.10 (Mandala. Sukta. Rik)
8.4.06.05 (Ashtaka. Adhyaya. Varga. Rik)
10.07.080 (Mandala. Anuvāka. Rik)
Samhita Devanagari Accented
नृ॒चक्षा॒ रक्षः॒ परि॑ पश्य वि॒क्षु तस्य॒ त्रीणि॒ प्रति॑ शृणी॒ह्यग्रा॑ ।
तस्या॑ग्ने पृ॒ष्टीर्हर॑सा शृणीहि त्रे॒धा मूलं॑ यातु॒धान॑स्य वृश्च ॥
Samhita Devanagari Nonaccented
नृचक्षा रक्षः परि पश्य विक्षु तस्य त्रीणि प्रति शृणीह्यग्रा ।
तस्याग्ने पृष्टीर्हरसा शृणीहि त्रेधा मूलं यातुधानस्य वृश्च ॥
Samhita Transcription Accented
nṛcákṣā rákṣaḥ pári paśya vikṣú tásya trī́ṇi práti śṛṇīhyágrā ǀ
tásyāgne pṛṣṭī́rhárasā śṛṇīhi tredhā́ mū́lam yātudhā́nasya vṛśca ǁ
Samhita Transcription Nonaccented
nṛcakṣā rakṣaḥ pari paśya vikṣu tasya trīṇi prati śṛṇīhyagrā ǀ
tasyāgne pṛṣṭīrharasā śṛṇīhi tredhā mūlam yātudhānasya vṛśca ǁ
Padapatha Devanagari Accented
नृ॒ऽचक्षाः॑ । रक्षः॑ । परि॑ । प॒श्य॒ । वि॒क्षु । तस्य॑ । त्रीणि॑ । प्रति॑ । शृ॒णी॒हि॒ । अग्रा॑ ।
तस्य॑ । अ॒ग्ने॒ । पृ॒ष्टीः । हर॑सा । शृ॒णी॒हि॒ । त्रे॒धा । मूल॑म् । या॒तु॒ऽधान॑स्य । वृ॒श्च॒ ॥
Padapatha Devanagari Nonaccented
नृऽचक्षाः । रक्षः । परि । पश्य । विक्षु । तस्य । त्रीणि । प्रति । शृणीहि । अग्रा ।
तस्य । अग्ने । पृष्टीः । हरसा । शृणीहि । त्रेधा । मूलम् । यातुऽधानस्य । वृश्च ॥
Padapatha Transcription Accented
nṛ-cákṣāḥ ǀ rákṣaḥ ǀ pári ǀ paśya ǀ vikṣú ǀ tásya ǀ trī́ṇi ǀ práti ǀ śṛṇīhi ǀ ágrā ǀ
tásya ǀ agne ǀ pṛṣṭī́ḥ ǀ hárasā ǀ śṛṇīhi ǀ tredhā́ ǀ mū́lam ǀ yātu-dhā́nasya ǀ vṛśca ǁ
Padapatha Transcription Nonaccented
nṛ-cakṣāḥ ǀ rakṣaḥ ǀ pari ǀ paśya ǀ vikṣu ǀ tasya ǀ trīṇi ǀ prati ǀ śṛṇīhi ǀ agrā ǀ
tasya ǀ agne ǀ pṛṣṭīḥ ǀ harasā ǀ śṛṇīhi ǀ tredhā ǀ mūlam ǀ yātu-dhānasya ǀ vṛśca ǁ
10.087.11 (Mandala. Sukta. Rik)
8.4.07.01 (Ashtaka. Adhyaya. Varga. Rik)
10.07.081 (Mandala. Anuvāka. Rik)
Samhita Devanagari Accented
त्रिर्या॑तु॒धानः॒ प्रसि॑तिं त एत्वृ॒तं यो अ॑ग्ने॒ अनृ॑तेन॒ हंति॑ ।
तम॒र्चिषा॑ स्फू॒र्जयं॑जातवेदः सम॒क्षमे॑नं गृण॒ते नि वृ॑ङ्धि ॥
Samhita Devanagari Nonaccented
त्रिर्यातुधानः प्रसितिं त एत्वृतं यो अग्ने अनृतेन हंति ।
तमर्चिषा स्फूर्जयंजातवेदः समक्षमेनं गृणते नि वृङ्धि ॥
Samhita Transcription Accented
tríryātudhā́naḥ prásitim ta etvṛtám yó agne ánṛtena hánti ǀ
támarcíṣā sphūrjáyañjātavedaḥ samakṣámenam gṛṇaté ní vṛṅdhi ǁ
Samhita Transcription Nonaccented
triryātudhānaḥ prasitim ta etvṛtam yo agne anṛtena hanti ǀ
tamarciṣā sphūrjayañjātavedaḥ samakṣamenam gṛṇate ni vṛṅdhi ǁ
Padapatha Devanagari Accented
त्रिः । या॒तु॒ऽधानः॑ । प्रऽसि॑तिम् । ते॒ । ए॒तु॒ । ऋ॒तम् । यः । अ॒ग्ने॒ । अनृ॑तेन । हन्ति॑ ।
तम् । अ॒र्चिषा॑ । स्फू॒र्जय॑न् । जा॒त॒ऽवे॒दः॒ । स॒म्ऽअ॒क्षम् । ए॒न॒म् । गृ॒ण॒ते । नि । वृ॒ङ्धि॒ ॥
Padapatha Devanagari Nonaccented
त्रिः । यातुऽधानः । प्रऽसितिम् । ते । एतु । ऋतम् । यः । अग्ने । अनृतेन । हन्ति ।
तम् । अर्चिषा । स्फूर्जयन् । जातऽवेदः । सम्ऽअक्षम् । एनम् । गृणते । नि । वृङ्धि ॥
Padapatha Transcription Accented
tríḥ ǀ yātu-dhā́naḥ ǀ prá-sitim ǀ te ǀ etu ǀ ṛtám ǀ yáḥ ǀ agne ǀ ánṛtena ǀ hánti ǀ
tám ǀ arcíṣā ǀ sphūrjáyan ǀ jāta-vedaḥ ǀ sam-akṣám ǀ enam ǀ gṛṇaté ǀ ní ǀ vṛṅdhi ǁ
Padapatha Transcription Nonaccented
triḥ ǀ yātu-dhānaḥ ǀ pra-sitim ǀ te ǀ etu ǀ ṛtam ǀ yaḥ ǀ agne ǀ anṛtena ǀ hanti ǀ
tam ǀ arciṣā ǀ sphūrjayan ǀ jāta-vedaḥ ǀ sam-akṣam ǀ enam ǀ gṛṇate ǀ ni ǀ vṛṅdhi ǁ
10.087.12 (Mandala. Sukta. Rik)
8.4.07.02 (Ashtaka. Adhyaya. Varga. Rik)
10.07.082 (Mandala. Anuvāka. Rik)
Samhita Devanagari Accented
तद॑ग्ने॒ चक्षुः॒ प्रति॑ धेहि रे॒भे श॑फा॒रुजं॒ येन॒ पश्य॑सि यातु॒धानं॑ ।
अ॒थ॒र्व॒वज्ज्योति॑षा॒ दैव्ये॑न स॒त्यं धूर्वं॑तम॒चितं॒ न्यो॑ष ॥
Samhita Devanagari Nonaccented
तदग्ने चक्षुः प्रति धेहि रेभे शफारुजं येन पश्यसि यातुधानं ।
अथर्ववज्ज्योतिषा दैव्येन सत्यं धूर्वंतमचितं न्योष ॥
Samhita Transcription Accented
tádagne cákṣuḥ práti dhehi rebhé śaphārújam yéna páśyasi yātudhā́nam ǀ
atharvavájjyótiṣā dáivyena satyám dhū́rvantamacítam nyóṣa ǁ
Samhita Transcription Nonaccented
tadagne cakṣuḥ prati dhehi rebhe śaphārujam yena paśyasi yātudhānam ǀ
atharvavajjyotiṣā daivyena satyam dhūrvantamacitam nyoṣa ǁ
Padapatha Devanagari Accented
तत् । अ॒ग्ने॒ । चक्षुः॑ । प्रति॑ । धे॒हि॒ । रे॒भे । श॒फ॒ऽआ॒रुज॑म् । येन॑ । पश्य॑सि । या॒तु॒ऽधान॑म् ।
अ॒थ॒र्व॒ऽवत् । ज्योति॑षा । दैव्ये॑न । स॒त्यम् । धूर्व॑न्तम् । अ॒चित॑म् । नि । ओ॒ष॒ ॥
Padapatha Devanagari Nonaccented
तत् । अग्ने । चक्षुः । प्रति । धेहि । रेभे । शफऽआरुजम् । येन । पश्यसि । यातुऽधानम् ।
अथर्वऽवत् । ज्योतिषा । दैव्येन । सत्यम् । धूर्वन्तम् । अचितम् । नि । ओष ॥
Padapatha Transcription Accented
tát ǀ agne ǀ cákṣuḥ ǀ práti ǀ dhehi ǀ rebhé ǀ śapha-ārújam ǀ yéna ǀ páśyasi ǀ yātu-dhā́nam ǀ
atharva-vát ǀ jyótiṣā ǀ dáivyena ǀ satyám ǀ dhū́rvantam ǀ acítam ǀ ní ǀ oṣa ǁ
Padapatha Transcription Nonaccented
tat ǀ agne ǀ cakṣuḥ ǀ prati ǀ dhehi ǀ rebhe ǀ śapha-ārujam ǀ yena ǀ paśyasi ǀ yātu-dhānam ǀ
atharva-vat ǀ jyotiṣā ǀ daivyena ǀ satyam ǀ dhūrvantam ǀ acitam ǀ ni ǀ oṣa ǁ
10.087.13 (Mandala. Sukta. Rik)
8.4.07.03 (Ashtaka. Adhyaya. Varga. Rik)
10.07.083 (Mandala. Anuvāka. Rik)
Samhita Devanagari Accented
यद॑ग्ने अ॒द्य मि॑थु॒ना शपा॑तो॒ यद्वा॒चस्तृ॒ष्टं ज॒नयं॑त रे॒भाः ।
म॒न्योर्मन॑सः शर॒व्या॒३॒॑ जाय॑ते॒ या तया॑ विध्य॒ हृद॑ये यातु॒धाना॑न् ॥
Samhita Devanagari Nonaccented
यदग्ने अद्य मिथुना शपातो यद्वाचस्तृष्टं जनयंत रेभाः ।
मन्योर्मनसः शरव्या जायते या तया विध्य हृदये यातुधानान् ॥
Samhita Transcription Accented
yádagne adyá mithunā́ śápāto yádvācástṛṣṭám janáyanta rebhā́ḥ ǀ
manyórmánasaḥ śaravyā́ jā́yate yā́ táyā vidhya hṛ́daye yātudhā́nān ǁ
Samhita Transcription Nonaccented
yadagne adya mithunā śapāto yadvācastṛṣṭam janayanta rebhāḥ ǀ
manyormanasaḥ śaravyā jāyate yā tayā vidhya hṛdaye yātudhānān ǁ
Padapatha Devanagari Accented
यत् । अ॒ग्ने॒ । अ॒द्य । मि॒थु॒ना । शपा॑तः । यत् । वा॒चः । तृ॒ष्टम् । ज॒नय॑न्त । रे॒भाः ।
म॒न्योः । मन॑सः । श॒र॒व्या॑ । जाय॑ते । या । तया॑ । वि॒ध्य॒ । हृद॑ये । या॒तु॒ऽधाना॑न् ॥
Padapatha Devanagari Nonaccented
यत् । अग्ने । अद्य । मिथुना । शपातः । यत् । वाचः । तृष्टम् । जनयन्त । रेभाः ।
मन्योः । मनसः । शरव्या । जायते । या । तया । विध्य । हृदये । यातुऽधानान् ॥
Padapatha Transcription Accented
yát ǀ agne ǀ adyá ǀ mithunā́ ǀ śápātaḥ ǀ yát ǀ vācáḥ ǀ tṛṣṭám ǀ janáyanta ǀ rebhā́ḥ ǀ
manyóḥ ǀ mánasaḥ ǀ śaravyā́ ǀ jā́yate ǀ yā́ ǀ táyā ǀ vidhya ǀ hṛ́daye ǀ yātu-dhā́nān ǁ
Padapatha Transcription Nonaccented
yat ǀ agne ǀ adya ǀ mithunā ǀ śapātaḥ ǀ yat ǀ vācaḥ ǀ tṛṣṭam ǀ janayanta ǀ rebhāḥ ǀ
manyoḥ ǀ manasaḥ ǀ śaravyā ǀ jāyate ǀ yā ǀ tayā ǀ vidhya ǀ hṛdaye ǀ yātu-dhānān ǁ
10.087.14 (Mandala. Sukta. Rik)
8.4.07.04 (Ashtaka. Adhyaya. Varga. Rik)
10.07.084 (Mandala. Anuvāka. Rik)
Samhita Devanagari Accented
परा॑ शृणीहि॒ तप॑सा यातु॒धाना॒न्परा॑ग्ने॒ रक्षो॒ हर॑सा शृणीहि ।
परा॒र्चिषा॒ मूर॑देवांछृणीहि॒ परा॑सु॒तृपो॑ अ॒भि शोशु॑चानः ॥
Samhita Devanagari Nonaccented
परा शृणीहि तपसा यातुधानान्पराग्ने रक्षो हरसा शृणीहि ।
परार्चिषा मूरदेवांछृणीहि परासुतृपो अभि शोशुचानः ॥
Samhita Transcription Accented
párā śṛṇīhi tápasā yātudhā́nānpárāgne rákṣo hárasā śṛṇīhi ǀ
párārcíṣā mū́radevāñchṛṇīhi párāsutṛ́po abhí śóśucānaḥ ǁ
Samhita Transcription Nonaccented
parā śṛṇīhi tapasā yātudhānānparāgne rakṣo harasā śṛṇīhi ǀ
parārciṣā mūradevāñchṛṇīhi parāsutṛpo abhi śośucānaḥ ǁ
Padapatha Devanagari Accented
परा॑ । शृ॒णी॒हि॒ । तप॑सा । या॒तु॒ऽधाना॑न् । परा॑ । अ॒ग्ने॒ । रक्षः॑ । हर॑सा । शृ॒णी॒हि॒ ।
परा॑ । अ॒र्चिषा॑ । मूर॑ऽदेवान् । शृ॒णी॒हि॒ । परा॑ । अ॒सु॒ऽतृपः॑ । अ॒भि । शोशु॑चानः ॥
Padapatha Devanagari Nonaccented
परा । शृणीहि । तपसा । यातुऽधानान् । परा । अग्ने । रक्षः । हरसा । शृणीहि ।
परा । अर्चिषा । मूरऽदेवान् । शृणीहि । परा । असुऽतृपः । अभि । शोशुचानः ॥
Padapatha Transcription Accented
párā ǀ śṛṇīhi ǀ tápasā ǀ yātu-dhā́nān ǀ párā ǀ agne ǀ rákṣaḥ ǀ hárasā ǀ śṛṇīhi ǀ
párā ǀ arcíṣā ǀ mū́ra-devān ǀ śṛṇīhi ǀ párā ǀ asu-tṛ́paḥ ǀ abhí ǀ śóśucānaḥ ǁ
Padapatha Transcription Nonaccented
parā ǀ śṛṇīhi ǀ tapasā ǀ yātu-dhānān ǀ parā ǀ agne ǀ rakṣaḥ ǀ harasā ǀ śṛṇīhi ǀ
parā ǀ arciṣā ǀ mūra-devān ǀ śṛṇīhi ǀ parā ǀ asu-tṛpaḥ ǀ abhi ǀ śośucānaḥ ǁ
10.087.15 (Mandala. Sukta. Rik)
8.4.07.05 (Ashtaka. Adhyaya. Varga. Rik)
10.07.085 (Mandala. Anuvāka. Rik)
Samhita Devanagari Accented
परा॒द्य दे॒वा वृ॑जि॒नं शृ॑णंतु प्र॒त्यगे॑नं श॒पथा॑ यंतु तृ॒ष्टाः ।
वा॒चास्ते॑नं॒ शर॑व ऋच्छंतु॒ मर्म॒न्विश्व॑स्यैतु॒ प्रसि॑तिं यातु॒धानः॑ ॥
Samhita Devanagari Nonaccented
पराद्य देवा वृजिनं शृणंतु प्रत्यगेनं शपथा यंतु तृष्टाः ।
वाचास्तेनं शरव ऋच्छंतु मर्मन्विश्वस्यैतु प्रसितिं यातुधानः ॥
Samhita Transcription Accented
párādyá devā́ vṛjinám śṛṇantu pratyágenam śapáthā yantu tṛṣṭā́ḥ ǀ
vācā́stenam śárava ṛcchantu mármanvíśvasyaitu prásitim yātudhā́naḥ ǁ
Samhita Transcription Nonaccented
parādya devā vṛjinam śṛṇantu pratyagenam śapathā yantu tṛṣṭāḥ ǀ
vācāstenam śarava ṛcchantu marmanviśvasyaitu prasitim yātudhānaḥ ǁ
Padapatha Devanagari Accented
परा॑ । अ॒द्य । दे॒वाः । वृ॒जि॒नम् । शृ॒ण॒न्तु॒ । प्र॒त्यक् । ए॒न॒म् । श॒पथाः॑ । य॒न्तु॒ । तृ॒ष्टाः ।
वा॒चाऽस्ते॑नम् । शर॑वः । ऋ॒च्छ॒न्तु॒ । मर्म॑न् । विश्व॑स्य । ए॒तु॒ । प्रऽसि॑तिम् । या॒तु॒ऽधानः॑ ॥
Padapatha Devanagari Nonaccented
परा । अद्य । देवाः । वृजिनम् । शृणन्तु । प्रत्यक् । एनम् । शपथाः । यन्तु । तृष्टाः ।
वाचाऽस्तेनम् । शरवः । ऋच्छन्तु । मर्मन् । विश्वस्य । एतु । प्रऽसितिम् । यातुऽधानः ॥
Padapatha Transcription Accented
párā ǀ adyá ǀ devā́ḥ ǀ vṛjinám ǀ śṛṇantu ǀ pratyák ǀ enam ǀ śapáthāḥ ǀ yantu ǀ tṛṣṭā́ḥ ǀ
vācā́-stenam ǀ śáravaḥ ǀ ṛcchantu ǀ márman ǀ víśvasya ǀ etu ǀ prá-sitim ǀ yātu-dhā́naḥ ǁ
Padapatha Transcription Nonaccented
parā ǀ adya ǀ devāḥ ǀ vṛjinam ǀ śṛṇantu ǀ pratyak ǀ enam ǀ śapathāḥ ǀ yantu ǀ tṛṣṭāḥ ǀ
vācā-stenam ǀ śaravaḥ ǀ ṛcchantu ǀ marman ǀ viśvasya ǀ etu ǀ pra-sitim ǀ yātu-dhānaḥ ǁ
10.087.16 (Mandala. Sukta. Rik)
8.4.08.01 (Ashtaka. Adhyaya. Varga. Rik)
10.07.086 (Mandala. Anuvāka. Rik)
Samhita Devanagari Accented
यः पौरु॑षेयेण क्र॒विषा॑ समं॒क्ते यो अश्व्ये॑न प॒शुना॑ यातु॒धानः॑ ।
यो अ॒घ्न्याया॒ भर॑ति क्षी॒रम॑ग्ने॒ तेषां॑ शी॒र्षाणि॒ हर॒सापि॑ वृश्च ॥
Samhita Devanagari Nonaccented
यः पौरुषेयेण क्रविषा समंक्ते यो अश्व्येन पशुना यातुधानः ।
यो अघ्न्याया भरति क्षीरमग्ने तेषां शीर्षाणि हरसापि वृश्च ॥
Samhita Transcription Accented
yáḥ páuruṣeyeṇa kravíṣā samaṅkté yó áśvyena paśúnā yātudhā́naḥ ǀ
yó aghnyā́yā bhárati kṣīrámagne téṣām śīrṣā́ṇi hárasā́pi vṛśca ǁ
Samhita Transcription Nonaccented
yaḥ pauruṣeyeṇa kraviṣā samaṅkte yo aśvyena paśunā yātudhānaḥ ǀ
yo aghnyāyā bharati kṣīramagne teṣām śīrṣāṇi harasāpi vṛśca ǁ
Padapatha Devanagari Accented
यः । पौरु॑षेयेण । क्र॒विषा॑ । स॒म्ऽअ॒ङ्क्ते । यः । अश्व्ये॑न । प॒शुना॑ । या॒तु॒ऽधानः॑ ।
यः । अ॒घ्न्यायाः॑ । भर॑ति । क्षी॒रम् । अ॒ग्ने॒ । तेषा॑म् । शी॒र्षाणि॑ । हर॑सा । अपि॑ । वृ॒श्च॒ ॥
Padapatha Devanagari Nonaccented
यः । पौरुषेयेण । क्रविषा । सम्ऽअङ्क्ते । यः । अश्व्येन । पशुना । यातुऽधानः ।
यः । अघ्न्यायाः । भरति । क्षीरम् । अग्ने । तेषाम् । शीर्षाणि । हरसा । अपि । वृश्च ॥
Padapatha Transcription Accented
yáḥ ǀ páuruṣeyeṇa ǀ kravíṣā ǀ sam-aṅkté ǀ yáḥ ǀ áśvyena ǀ paśúnā ǀ yātu-dhā́naḥ ǀ
yáḥ ǀ aghnyā́yāḥ ǀ bhárati ǀ kṣīrám ǀ agne ǀ téṣām ǀ śīrṣā́ṇi ǀ hárasā ǀ ápi ǀ vṛśca ǁ
Padapatha Transcription Nonaccented
yaḥ ǀ pauruṣeyeṇa ǀ kraviṣā ǀ sam-aṅkte ǀ yaḥ ǀ aśvyena ǀ paśunā ǀ yātu-dhānaḥ ǀ
yaḥ ǀ aghnyāyāḥ ǀ bharati ǀ kṣīram ǀ agne ǀ teṣām ǀ śīrṣāṇi ǀ harasā ǀ api ǀ vṛśca ǁ
10.087.17 (Mandala. Sukta. Rik)
8.4.08.02 (Ashtaka. Adhyaya. Varga. Rik)
10.07.087 (Mandala. Anuvāka. Rik)
Samhita Devanagari Accented
सं॒व॒त्स॒रीणं॒ पय॑ उ॒स्रिया॑या॒स्तस्य॒ माशी॑द्यातु॒धानो॑ नृचक्षः ।
पी॒यूष॑मग्ने यत॒मस्तितृ॑प्सा॒त्तं प्र॒त्यंच॑म॒र्चिषा॑ विध्य॒ मर्म॑न् ॥
Samhita Devanagari Nonaccented
संवत्सरीणं पय उस्रियायास्तस्य माशीद्यातुधानो नृचक्षः ।
पीयूषमग्ने यतमस्तितृप्सात्तं प्रत्यंचमर्चिषा विध्य मर्मन् ॥
Samhita Transcription Accented
saṃvatsarī́ṇam páya usríyāyāstásya mā́śīdyātudhā́no nṛcakṣaḥ ǀ
pīyū́ṣamagne yatamástítṛpsāttám pratyáñcamarcíṣā vidhya márman ǁ
Samhita Transcription Nonaccented
saṃvatsarīṇam paya usriyāyāstasya māśīdyātudhāno nṛcakṣaḥ ǀ
pīyūṣamagne yatamastitṛpsāttam pratyañcamarciṣā vidhya marman ǁ
Padapatha Devanagari Accented
सं॒व॒त्स॒रीण॑म् । पयः॑ । उ॒स्रिया॑याः । तस्य॑ । मा । अ॒शी॒त् । या॒तु॒ऽधानः॑ । नृ॒ऽच॒क्षः॒ ।
पी॒यूष॑म् । अ॒ग्ने॒ । य॒त॒मः । तितृ॑प्सात् । तम् । प्र॒त्यञ्च॑म् । अ॒र्चिषा॑ । वि॒ध्य॒ । मर्म॑न् ॥
Padapatha Devanagari Nonaccented
संवत्सरीणम् । पयः । उस्रियायाः । तस्य । मा । अशीत् । यातुऽधानः । नृऽचक्षः ।
पीयूषम् । अग्ने । यतमः । तितृप्सात् । तम् । प्रत्यञ्चम् । अर्चिषा । विध्य । मर्मन् ॥
Padapatha Transcription Accented
saṃvatsarī́ṇam ǀ páyaḥ ǀ usríyāyāḥ ǀ tásya ǀ mā́ ǀ aśīt ǀ yātu-dhā́naḥ ǀ nṛ-cakṣaḥ ǀ
pīyū́ṣam ǀ agne ǀ yatamáḥ ǀ títṛpsāt ǀ tám ǀ pratyáñcam ǀ arcíṣā ǀ vidhya ǀ márman ǁ
Padapatha Transcription Nonaccented
saṃvatsarīṇam ǀ payaḥ ǀ usriyāyāḥ ǀ tasya ǀ mā ǀ aśīt ǀ yātu-dhānaḥ ǀ nṛ-cakṣaḥ ǀ
pīyūṣam ǀ agne ǀ yatamaḥ ǀ titṛpsāt ǀ tam ǀ pratyañcam ǀ arciṣā ǀ vidhya ǀ marman ǁ
10.087.18 (Mandala. Sukta. Rik)
8.4.08.03 (Ashtaka. Adhyaya. Varga. Rik)
10.07.088 (Mandala. Anuvāka. Rik)
Samhita Devanagari Accented
वि॒षं गवां॑ यातु॒धानाः॑ पिबं॒त्वा वृ॑श्च्यंता॒मदि॑तये दु॒रेवाः॑ ।
परै॑नांदे॒वः स॑वि॒ता द॑दातु॒ परा॑ भा॒गमोष॑धीनां जयंतां ॥
Samhita Devanagari Nonaccented
विषं गवां यातुधानाः पिबंत्वा वृश्च्यंतामदितये दुरेवाः ।
परैनांदेवः सविता ददातु परा भागमोषधीनां जयंतां ॥
Samhita Transcription Accented
viṣám gávām yātudhā́nāḥ pibantvā́ vṛścyantāmáditaye durévāḥ ǀ
páraināndeváḥ savitā́ dadātu párā bhāgámóṣadhīnām jayantām ǁ
Samhita Transcription Nonaccented
viṣam gavām yātudhānāḥ pibantvā vṛścyantāmaditaye durevāḥ ǀ
paraināndevaḥ savitā dadātu parā bhāgamoṣadhīnām jayantām ǁ
Padapatha Devanagari Accented
वि॒षम् । गवा॑म् । या॒तु॒ऽधानाः॑ । पि॒ब॒न्तु॒ । आ । वृ॒श्च्य॒न्ता॒म् । अदि॑तये । दुः॒ऽएवाः॑ ।
परा॑ । ए॒ना॒न् । दे॒वः । स॒वि॒ता । द॒दा॒तु॒ । परा॑ । भा॒गम् । ओष॑धीनाम् । ज॒य॒न्ता॒म् ॥
Padapatha Devanagari Nonaccented
विषम् । गवाम् । यातुऽधानाः । पिबन्तु । आ । वृश्च्यन्ताम् । अदितये । दुःऽएवाः ।
परा । एनान् । देवः । सविता । ददातु । परा । भागम् । ओषधीनाम् । जयन्ताम् ॥
Padapatha Transcription Accented
viṣám ǀ gávām ǀ yātu-dhā́nāḥ ǀ pibantu ǀ ā́ ǀ vṛścyantām ǀ áditaye ǀ duḥ-évāḥ ǀ
párā ǀ enān ǀ deváḥ ǀ savitā́ ǀ dadātu ǀ párā ǀ bhāgám ǀ óṣadhīnām ǀ jayantām ǁ
Padapatha Transcription Nonaccented
viṣam ǀ gavām ǀ yātu-dhānāḥ ǀ pibantu ǀ ā ǀ vṛścyantām ǀ aditaye ǀ duḥ-evāḥ ǀ
parā ǀ enān ǀ devaḥ ǀ savitā ǀ dadātu ǀ parā ǀ bhāgam ǀ oṣadhīnām ǀ jayantām ǁ
10.087.19 (Mandala. Sukta. Rik)
8.4.08.04 (Ashtaka. Adhyaya. Varga. Rik)
10.07.089 (Mandala. Anuvāka. Rik)
Samhita Devanagari Accented
स॒नाद॑ग्ने मृणसि यातु॒धाना॒न्न त्वा॒ रक्षां॑सि॒ पृत॑नासु जिग्युः ।
अनु॑ दह स॒हमू॑रान्क्र॒व्यादो॒ मा ते॑ हे॒त्या मु॑क्षत॒ दैव्या॑याः ॥
Samhita Devanagari Nonaccented
सनादग्ने मृणसि यातुधानान्न त्वा रक्षांसि पृतनासु जिग्युः ।
अनु दह सहमूरान्क्रव्यादो मा ते हेत्या मुक्षत दैव्यायाः ॥
Samhita Transcription Accented
sanā́dagne mṛṇasi yātudhā́nānná tvā rákṣāṃsi pṛ́tanāsu jigyuḥ ǀ
ánu daha sahámūrānkravyā́do mā́ te hetyā́ mukṣata dáivyāyāḥ ǁ
Samhita Transcription Nonaccented
sanādagne mṛṇasi yātudhānānna tvā rakṣāṃsi pṛtanāsu jigyuḥ ǀ
anu daha sahamūrānkravyādo mā te hetyā mukṣata daivyāyāḥ ǁ
Padapatha Devanagari Accented
स॒नात् । अ॒ग्ने॒ । मृ॒ण॒सि॒ । या॒तु॒ऽधाना॑न् । न । त्वा॒ । रक्षां॑सि । पृत॑नासु । जि॒ग्युः॒ ।
अनु॑ । द॒ह॒ । स॒हऽमू॑रान् । क्र॒व्य॒ऽअदः॑ । मा । ते॒ । हे॒त्याः । मु॒क्ष॒त॒ । दैव्या॑याः ॥
Padapatha Devanagari Nonaccented
सनात् । अग्ने । मृणसि । यातुऽधानान् । न । त्वा । रक्षांसि । पृतनासु । जिग्युः ।
अनु । दह । सहऽमूरान् । क्रव्यऽअदः । मा । ते । हेत्याः । मुक्षत । दैव्यायाः ॥
Padapatha Transcription Accented
sanā́t ǀ agne ǀ mṛṇasi ǀ yātu-dhā́nān ǀ ná ǀ tvā ǀ rákṣāṃsi ǀ pṛ́tanāsu ǀ jigyuḥ ǀ
ánu ǀ daha ǀ sahá-mūrān ǀ kravya-ádaḥ ǀ mā́ ǀ te ǀ hetyā́ḥ ǀ mukṣata ǀ dáivyāyāḥ ǁ
Padapatha Transcription Nonaccented
sanāt ǀ agne ǀ mṛṇasi ǀ yātu-dhānān ǀ na ǀ tvā ǀ rakṣāṃsi ǀ pṛtanāsu ǀ jigyuḥ ǀ
anu ǀ daha ǀ saha-mūrān ǀ kravya-adaḥ ǀ mā ǀ te ǀ hetyāḥ ǀ mukṣata ǀ daivyāyāḥ ǁ
10.087.20 (Mandala. Sukta. Rik)
8.4.08.05 (Ashtaka. Adhyaya. Varga. Rik)
10.07.090 (Mandala. Anuvāka. Rik)
Samhita Devanagari Accented
त्वं नो॑ अग्ने अध॒रादुद॑क्ता॒त्त्वं प॒श्चादु॒त र॑क्षा पु॒रस्ता॑त् ।
प्रति॒ ते ते॑ अ॒जरा॑स॒स्तपि॑ष्ठा अ॒घशं॑सं॒ शोशु॑चतो दहंतु ॥
Samhita Devanagari Nonaccented
त्वं नो अग्ने अधरादुदक्तात्त्वं पश्चादुत रक्षा पुरस्तात् ।
प्रति ते ते अजरासस्तपिष्ठा अघशंसं शोशुचतो दहंतु ॥
Samhita Transcription Accented
tvám no agne adharā́dúdaktāttvám paścā́dutá rakṣā purástāt ǀ
práti té te ajárāsastápiṣṭhā agháśaṃsam śóśucato dahantu ǁ
Samhita Transcription Nonaccented
tvam no agne adharādudaktāttvam paścāduta rakṣā purastāt ǀ
prati te te ajarāsastapiṣṭhā aghaśaṃsam śośucato dahantu ǁ
Padapatha Devanagari Accented
त्वम् । नः॒ । अ॒ग्ने॒ । अ॒ध॒रात् । उद॑क्तात् । त्वम् । प॒श्चात् । उ॒त । र॒क्ष॒ । पु॒रस्ता॑त् ।
प्रति॑ । ते । ते॒ । अ॒जरा॑सः । तपि॑ष्ठाः । अ॒घऽशं॑सम् । शोशु॑चतः । द॒ह॒न्तु॒ ॥
Padapatha Devanagari Nonaccented
त्वम् । नः । अग्ने । अधरात् । उदक्तात् । त्वम् । पश्चात् । उत । रक्ष । पुरस्तात् ।
प्रति । ते । ते । अजरासः । तपिष्ठाः । अघऽशंसम् । शोशुचतः । दहन्तु ॥
Padapatha Transcription Accented
tvám ǀ naḥ ǀ agne ǀ adharā́t ǀ údaktāt ǀ tvám ǀ paścā́t ǀ utá ǀ rakṣa ǀ purástāt ǀ
práti ǀ té ǀ te ǀ ajárāsaḥ ǀ tápiṣṭhāḥ ǀ aghá-śaṃsam ǀ śóśucataḥ ǀ dahantu ǁ
Padapatha Transcription Nonaccented
tvam ǀ naḥ ǀ agne ǀ adharāt ǀ udaktāt ǀ tvam ǀ paścāt ǀ uta ǀ rakṣa ǀ purastāt ǀ
prati ǀ te ǀ te ǀ ajarāsaḥ ǀ tapiṣṭhāḥ ǀ agha-śaṃsam ǀ śośucataḥ ǀ dahantu ǁ
10.087.21 (Mandala. Sukta. Rik)
8.4.09.01 (Ashtaka. Adhyaya. Varga. Rik)
10.07.091 (Mandala. Anuvāka. Rik)
Samhita Devanagari Accented
प॒श्चात्पु॒रस्ता॑दध॒रादुद॑क्तात्क॒विः काव्ये॑न॒ परि॑ पाहि राजन् ।
सखे॒ सखा॑यम॒जरो॑ जरि॒म्णेऽग्ने॒ मर्ताँ॒ अम॑र्त्य॒स्त्वं नः॑ ॥
Samhita Devanagari Nonaccented
पश्चात्पुरस्तादधरादुदक्तात्कविः काव्येन परि पाहि राजन् ।
सखे सखायमजरो जरिम्णेऽग्ने मर्ताँ अमर्त्यस्त्वं नः ॥
Samhita Transcription Accented
paścā́tpurástādadharā́dúdaktātkavíḥ kā́vyena pári pāhi rājan ǀ
sákhe sákhāyamajáro jarimṇé’gne mártām̐ ámartyastvám naḥ ǁ
Samhita Transcription Nonaccented
paścātpurastādadharādudaktātkaviḥ kāvyena pari pāhi rājan ǀ
sakhe sakhāyamajaro jarimṇe’gne martām̐ amartyastvam naḥ ǁ
Padapatha Devanagari Accented
प॒श्चात् । पु॒रस्ता॑त् । अ॒ध॒रात् । उद॑क्तात् । क॒विः । काव्ये॑न । परि॑ । पा॒हि॒ । रा॒ज॒न् ।
सखे॑ । सखा॑यम् । अ॒जरः॑ । ज॒रि॒म्णे । अग्ने॑ । मर्ता॑न् । अम॑र्त्यः । त्वम् । नः॒ ॥
Padapatha Devanagari Nonaccented
पश्चात् । पुरस्तात् । अधरात् । उदक्तात् । कविः । काव्येन । परि । पाहि । राजन् ।
सखे । सखायम् । अजरः । जरिम्णे । अग्ने । मर्तान् । अमर्त्यः । त्वम् । नः ॥
Padapatha Transcription Accented
paścā́t ǀ purástāt ǀ adharā́t ǀ údaktāt ǀ kavíḥ ǀ kā́vyena ǀ pári ǀ pāhi ǀ rājan ǀ
sákhe ǀ sákhāyam ǀ ajáraḥ ǀ jarimṇé ǀ ágne ǀ mártān ǀ ámartyaḥ ǀ tvám ǀ naḥ ǁ
Padapatha Transcription Nonaccented
paścāt ǀ purastāt ǀ adharāt ǀ udaktāt ǀ kaviḥ ǀ kāvyena ǀ pari ǀ pāhi ǀ rājan ǀ
sakhe ǀ sakhāyam ǀ ajaraḥ ǀ jarimṇe ǀ agne ǀ martān ǀ amartyaḥ ǀ tvam ǀ naḥ ǁ
10.087.22 (Mandala. Sukta. Rik)
8.4.09.02 (Ashtaka. Adhyaya. Varga. Rik)
10.07.092 (Mandala. Anuvāka. Rik)
Samhita Devanagari Accented
परि॑ त्वाग्ने॒ पुरं॑ व॒यं विप्रं॑ सहस्य धीमहि ।
धृ॒षद्व॑र्णं दि॒वेदि॑वे हं॒तारं॑ भंगु॒राव॑तां ॥
Samhita Devanagari Nonaccented
परि त्वाग्ने पुरं वयं विप्रं सहस्य धीमहि ।
धृषद्वर्णं दिवेदिवे हंतारं भंगुरावतां ॥
Samhita Transcription Accented
pári tvāgne púram vayám vípram sahasya dhīmahi ǀ
dhṛṣádvarṇam divédive hantā́ram bhaṅgurā́vatām ǁ
Samhita Transcription Nonaccented
pari tvāgne puram vayam vipram sahasya dhīmahi ǀ
dhṛṣadvarṇam divedive hantāram bhaṅgurāvatām ǁ
Padapatha Devanagari Accented
परि॑ । त्वा॒ । अ॒ग्ने॒ । पुर॑म् । व॒यम् । विप्र॑म् । स॒ह॒स्य॒ । धी॒म॒हि॒ ।
धृ॒षत्ऽव॑र्णम् । दि॒वेऽदि॑वे । ह॒न्तार॑म् । भ॒ङ्गु॒रऽव॑ताम् ॥
Padapatha Devanagari Nonaccented
परि । त्वा । अग्ने । पुरम् । वयम् । विप्रम् । सहस्य । धीमहि ।
धृषत्ऽवर्णम् । दिवेऽदिवे । हन्तारम् । भङ्गुरऽवताम् ॥
Padapatha Transcription Accented
pári ǀ tvā ǀ agne ǀ púram ǀ vayám ǀ vípram ǀ sahasya ǀ dhīmahi ǀ
dhṛṣát-varṇam ǀ divé-dive ǀ hantā́ram ǀ bhaṅgurá-vatām ǁ
Padapatha Transcription Nonaccented
pari ǀ tvā ǀ agne ǀ puram ǀ vayam ǀ vipram ǀ sahasya ǀ dhīmahi ǀ
dhṛṣat-varṇam ǀ dive-dive ǀ hantāram ǀ bhaṅgura-vatām ǁ
10.087.23 (Mandala. Sukta. Rik)
8.4.09.03 (Ashtaka. Adhyaya. Varga. Rik)
10.07.093 (Mandala. Anuvāka. Rik)
Samhita Devanagari Accented
वि॒षेण॑ भंगु॒राव॑तः॒ प्रति॑ ष्म र॒क्षसो॑ दह ।
अग्ने॑ ति॒ग्मेन॑ शो॒चिषा॒ तपु॑रग्राभिर्ऋ॒ष्टिभिः॑ ॥
Samhita Devanagari Nonaccented
विषेण भंगुरावतः प्रति ष्म रक्षसो दह ।
अग्ने तिग्मेन शोचिषा तपुरग्राभिर्ऋष्टिभिः ॥
Samhita Transcription Accented
viṣéṇa bhaṅgurā́vataḥ práti ṣma rakṣáso daha ǀ
ágne tigména śocíṣā tápuragrābhirṛṣṭíbhiḥ ǁ
Samhita Transcription Nonaccented
viṣeṇa bhaṅgurāvataḥ prati ṣma rakṣaso daha ǀ
agne tigmena śociṣā tapuragrābhirṛṣṭibhiḥ ǁ
Padapatha Devanagari Accented
वि॒षेण॑ । भ॒ङ्गु॒रऽव॑तः । प्रति॑ । स्म॒ । र॒क्षसः॑ । द॒ह॒ ।
अग्ने॑ । ति॒ग्मेन॑ । शो॒चिषा॑ । तपुः॑ऽअग्राभिः । ऋ॒ष्टिऽभिः॑ ॥
Padapatha Devanagari Nonaccented
विषेण । भङ्गुरऽवतः । प्रति । स्म । रक्षसः । दह ।
अग्ने । तिग्मेन । शोचिषा । तपुःऽअग्राभिः । ऋष्टिऽभिः ॥
Padapatha Transcription Accented
viṣéṇa ǀ bhaṅgurá-vataḥ ǀ práti ǀ sma ǀ rakṣásaḥ ǀ daha ǀ
ágne ǀ tigména ǀ śocíṣā ǀ tápuḥ-agrābhiḥ ǀ ṛṣṭí-bhiḥ ǁ
Padapatha Transcription Nonaccented
viṣeṇa ǀ bhaṅgura-vataḥ ǀ prati ǀ sma ǀ rakṣasaḥ ǀ daha ǀ
agne ǀ tigmena ǀ śociṣā ǀ tapuḥ-agrābhiḥ ǀ ṛṣṭi-bhiḥ ǁ
10.087.24 (Mandala. Sukta. Rik)
8.4.09.04 (Ashtaka. Adhyaya. Varga. Rik)
10.07.094 (Mandala. Anuvāka. Rik)
Samhita Devanagari Accented
प्रत्य॑ग्ने मिथु॒ना द॑ह यातु॒धाना॑ किमी॒दिना॑ ।
सं त्वा॑ शिशामि जागृ॒ह्यद॑ब्धं विप्र॒ मन्म॑भिः ॥
Samhita Devanagari Nonaccented
प्रत्यग्ने मिथुना दह यातुधाना किमीदिना ।
सं त्वा शिशामि जागृह्यदब्धं विप्र मन्मभिः ॥
Samhita Transcription Accented
prátyagne mithunā́ daha yātudhā́nā kimīdínā ǀ
sám tvā śiśāmi jāgṛhyádabdham vipra mánmabhiḥ ǁ
Samhita Transcription Nonaccented
pratyagne mithunā daha yātudhānā kimīdinā ǀ
sam tvā śiśāmi jāgṛhyadabdham vipra manmabhiḥ ǁ
Padapatha Devanagari Accented
प्रति॑ । अ॒ग्ने॒ । मि॒थु॒ना । द॒ह॒ । या॒तु॒ऽधाना॑ । कि॒मी॒दिना॑ ।
सम् । त्वा॒ । शि॒शा॒मि॒ । जा॒गृ॒हि । अद॑ब्धम् । वि॒प्र॒ । मन्म॑ऽभिः ॥
Padapatha Devanagari Nonaccented
प्रति । अग्ने । मिथुना । दह । यातुऽधाना । किमीदिना ।
सम् । त्वा । शिशामि । जागृहि । अदब्धम् । विप्र । मन्मऽभिः ॥
Padapatha Transcription Accented
práti ǀ agne ǀ mithunā́ ǀ daha ǀ yātu-dhā́nā ǀ kimīdínā ǀ
sám ǀ tvā ǀ śiśāmi ǀ jāgṛhí ǀ ádabdham ǀ vipra ǀ mánma-bhiḥ ǁ
Padapatha Transcription Nonaccented
prati ǀ agne ǀ mithunā ǀ daha ǀ yātu-dhānā ǀ kimīdinā ǀ
sam ǀ tvā ǀ śiśāmi ǀ jāgṛhi ǀ adabdham ǀ vipra ǀ manma-bhiḥ ǁ
10.087.25 (Mandala. Sukta. Rik)
8.4.09.05 (Ashtaka. Adhyaya. Varga. Rik)
10.07.095 (Mandala. Anuvāka. Rik)
Samhita Devanagari Accented
प्रत्य॑ग्ने॒ हर॑सा॒ हरः॑ शृणी॒हि वि॒श्वतः॒ प्रति॑ ।
या॒तु॒धान॑स्य र॒क्षसो॒ बलं॒ वि रु॑ज वी॒र्यं॑ ॥
Samhita Devanagari Nonaccented
प्रत्यग्ने हरसा हरः शृणीहि विश्वतः प्रति ।
यातुधानस्य रक्षसो बलं वि रुज वीर्यं ॥
Samhita Transcription Accented
prátyagne hárasā háraḥ śṛṇīhí viśvátaḥ práti ǀ
yātudhā́nasya rakṣáso bálam ví ruja vīryám ǁ
Samhita Transcription Nonaccented
pratyagne harasā haraḥ śṛṇīhi viśvataḥ prati ǀ
yātudhānasya rakṣaso balam vi ruja vīryam ǁ
Padapatha Devanagari Accented
प्रति॑ । अ॒ग्ने॒ । हर॑सा । हरः॑ । शृ॒णी॒हि । वि॒श्वतः॑ । प्रति॑ ।
या॒तु॒ऽधान॑स्य । र॒क्षसः॑ । बल॑म् । वि । रु॒ज॒ । वी॒र्य॑म् ॥
Padapatha Devanagari Nonaccented
प्रति । अग्ने । हरसा । हरः । शृणीहि । विश्वतः । प्रति ।
यातुऽधानस्य । रक्षसः । बलम् । वि । रुज । वीर्यम् ॥
Padapatha Transcription Accented
práti ǀ agne ǀ hárasā ǀ háraḥ ǀ śṛṇīhí ǀ viśvátaḥ ǀ práti ǀ
yātu-dhā́nasya ǀ rakṣásaḥ ǀ bálam ǀ ví ǀ ruja ǀ vīryám ǁ
Padapatha Transcription Nonaccented
prati ǀ agne ǀ harasā ǀ haraḥ ǀ śṛṇīhi ǀ viśvataḥ ǀ prati ǀ
yātu-dhānasya ǀ rakṣasaḥ ǀ balam ǀ vi ǀ ruja ǀ vīryam ǁ